श्रीगोंदा :श्रीगोंदा नगरपरिषद हद्दीलगत नव्याने दुरुस्त करण्यात आलेल्या रस्त्याचे काम निकृष्ट पद्धतीने सुरू असून कामासाठी निकृष्ट दर्जाचा मुरूम तसेच कालबाह्य मशिनरी वापरण्यात येत असल्याचे वारंवार सार्वजनिक बांधकाम प्रशासनाला कळविण्यात आले होते.
तसेच सदर काम करणाऱ्या ठेकेदारास कामाचा योग्य अनुभव नसल्याने सक्षम अधिकाऱ्यांच्या उपस्थितीतच काम सुरू ठेवण्याचे सांगण्यात आले होते. परंतु बांधकाम प्रशासन निवडणुकीच्या कामत व्यस्त असताना घाईघाईने रस्त्याचे काम पूर्ण करण्यात आले. त्यामुळे महीनाभरातच दुरुस्त केलेला रस्ता ठिकठिकाणी खचला असून अनेक ठिकाणी फुटून खड्डे पडण्यास सुरवात झाली आहे.
चौकट-
कामासाठी खर्च करण्यात येणारा पैसा जनतेचा असून अशा बोगस कामांसाठी मुळीच खर्च करू दिला जाणार नाही. –
इंजि. शामभाऊ जरे, तालुकाध्यक्ष संभाजी ब्रिगेड.
तत्काळ वरिष्ठ पातळीवर चौकशी अहवाल तयार करुन संबंधित ठेकेदारास काळ्या यादीत समाविष्ट करावे तसेच कामाची पाहणी करुन स्थगिती देण्यात यावी. अशी मागणी संभाजी ब्रिगेडने केली आहे.
