श्रीगोंदा : श्रीगोंद्याचा आठवडे बाजार सोमवारी भरतो. सोमवारी बाजारात भाजीपाल्यांची आवक कमी प्रमाणात दिसून आली त्यामुळे भाजीपाल्यांचे दर गगनाला भिडल्याचे पाहायला मिळाले. गेल्यावर्षी कमी प्रमाणात झालेल्या पावसाचा फटका इतर पिकांबरोबर भाजीपाल्याला बसलेला दिसून येत आहे. कमी पाऊस झाल्याने विहि्रींनी लवकरच तळ गाठला. उन्हाळ्यात पाणी कमी असल्यामुळे शेतकऱ्यांनी भाजीपाल्याची लागवड केली नाही. त्याचाच फटका भाजीपाल्याच्या वाढलेल्या दरावर दिसून येत आहे. सध्या श्रीगोंदा बाजारात नगर, पुण्याहून माल येत आहे. सध्या पाऊस लवकर आला आहे. आता भाजीपाल्याची लागवड केली तरी साधारणपणे भाजीपाला बाजारात येण्यास दोन महिने लागतात. सोमवारी (दिनांक 10) किरकोळ बाजारात असलेले भाजीपालायचे दर पुढीलप्रमाणे : गवार -80 ते 100रुपये, वांगी -80 रुपये, टोमॅटो -80 ते 100रुपये, कारली 80 रुपये, दोडका – 80 रुपये, हिरवी मिरची 80ते 100रुपये. पालेभाज्या : मेथी -20ते 30 रुपये, पालक – 15ते 20 रुपये, शेपू – 30 रुपये, कोथिंबीर जुडी 20ते 30 रुपये.
